‘ऑशविट्झचा फोटोवाला’ ही नावानुसार ऑशविट्झमधल्या ज्यू छळछावणीमध्ये असलेल्या विल्हेम ब्रास या फॉटोग्राफर कैद्याचे अनुभवकथन करणारी कादंबरी आहे. ती सत्यघटनेवर आधारलेली आहेच पण अजून अनेक सत्य घटना आणि समकालीन पुष्टी देणाऱ्या संदर्भांची जोड आहे. लुक क्रिप्पा आणि मॉरिझिओ ओनिस लेखक संशोधक जोडीने इटालियन भाषेत लिहिलेल्या पुस्तकाचा हा अनुवाद आहे. विल्हेम ब्रास हा तरुण फोटोग्राफर पोलिश वंशाचा होता, 1940 मध्ये जर्मनीने पोलंड जिंकल्यावर त्याची अनेकदा चौकशी केली गेली होती पण त्याने हिटलरचा निष्ठावंत होण्यास नकार दिला. पुढे फ्रांस मध्ये जाऊन मुक्त सैन्यात प्रवेश करण्याच्या बेतात असताना पोलंड सीमेवर त्याला अटक झाली आणि त्याची रवानगी राजकीय कैदी म्हणून ऑशविट्झमध्ये झाली. 1940 ते 1945 याकाळात त्याने जवळपास 50 हजार छायाचित्र काढली, जर्मन सैन्याच्या नजरेतून ती वाचवली. पुढे सामान्य आयुष्य जगताना पुन्हा कधीही कॅमेरा हातात घेतला नाही. या छायाचित्रांबाबत तो बराच काळ गप्प राहिला. छावणी नष्ट झाल्याच्या 60 वर्षानंतर त्याने बीबीसीला एक दीर्घ मुलाखत दिली आणि या पुस्तकाचा मसुदा तयार व्हायला मदत झाली. या पुस्तकामुळे ज्यू छळछावणी, त्यांची अमानुष कार्यपद्धती आणि आपल्याला ज्ञात असलेल्या सत्यापेक्षा अधिक जास्त दाहक असलेलं सत्य समोर आलं. जगाच्या अनेक भाषात ही कादंबरी भाषांतरित झाली आणि मग मराठीमध्ये आली.